ਹੈਕਰਾਂ ਦੇ ਨਿਸ਼ਾਨੇ 'ਤੇ ਸੋਸ਼ਲ ਨੈਟਵਰਕਿੰਗ ਸਾਈਟਸ

ਕੰਪਿਊਟਰ ਹੈਕਰਾਂ ਦੀਆਂ ਨਜ਼ਰਾਂ ਹੁਣ ਸੋਸ਼ਲ ਨੈਟਵਰਕਿੰਗ ਸਾਈਟਸ 'ਤੇ ਹਨ। ਇਹ ਦਾਅਵਾ ਅਮਰੀਕਾ ਦੀ ਇੱਕ ਕੰਪਿਊਟਰ ਸਕਿਓਰਿਟੀ ਫਰਮ ਨੇ ਕੀਤਾ ਹੈ। ਫਰਮ ਦਾ ਕਹਿਣਾ ਹੈ ਕਿ ਹੈਕਰ ਫੇਸਬੁੱਕ ਅਤੇ ਟਵਿਟਰ ਰਾਹੀਂ ਵਿਅਕਤੀਗਤ ਜਾਣਕਾਰੀਆਂ ਚੁਰਾਉਣ ਵਿੱਚ ਲੱਗੇ ਹੋਏ ਹਨ।



ਸੈਨ ਫ੍ਰਾਂਸਿਸਕੋ ਦੀ ਕੰਪਿਊਟਰ ਸਕਿਓਰਿਟੀ ਫਰਮ ਸੋਫੋਸ ਨੇ ਜਾਂਚ ਦੇ ਅਧਾਰ ਤੇ ਕਈ ਨਸੀਹਤਾਂ ਦਿੱਤੀਆਂ ਹਨ। ਸੋਫੋਜ ਦੇ ਮੁਤਾਬਕ ਸੋਸ਼ਲ ਨੈਟਵਰਕਿੰਗ ਸਾਈਟਸ ਵਿੱਚ ਸਪੈਮ ਮੈਸੇਜ ਦੇ ਮਾਮਲੇ ਵਧੇ ਹਨ ਅਤੇ ਇਹਨਾਂ ਰਾਹੀਂ ਕਈ ਵਾਇਰਸ ਇੱਧਰ-ਉੱਧਰ ਭੇਜੇ ਜਾ ਰਹੇ ਹਨ।



ਫਰਮ ਦਾ ਕਹਿਣਾ ਹੈ ਕਿ ਫੇਸਬੁੱਕ ਅਤੇ ਟਵਿਟਰ ਵਰਗੀਆਂ ਸੋਸ਼ਲ ਨੈਟਵਰਕਿੰਗ ਵੈਬਸਾਈਟਸ 'ਤੇ ਅਜਿਹੇ ਮਾਮਲੇ ਵਧਦੇ ਜਾ ਰਹੇ ਹਨ।



ਸੋਫੋਸ ਦੇ ਅਨੁਸਾਰ ਇਸ ਸਾਲ ਹੁਣ ਤੱਕ ਸਮਾਜਿਕ ਨੈਟਵਰਕਿੰਗ ਦੀ ਸਾਈਟਸ ਵਿੱਚ ਅਣਚਾਹੇ ਅਤੇ ਅਣਜਾਣ ਮੇਲ ਭੇਜਣ ਦੇ ਮਾਮਲੇ ਕਰੀਬ 71 ਫੀਸਦੀ ਵਧੇ ਹਨ। 36 ਫੀਸਦੀ ਯੂਜ਼ਰਸ ਨੇ ਵੀ ਮੰਨਿਆ ਹੈ ਕਿ ਉਹਨਾਂ ਨੂੰ ਵਾਇਰਸ, ਮੇਲਵੇਅਰ ਅਤੇ ਹੋਰ ਪ੍ਰੋਗ੍ਰਾਮ ਪਤਾ ਨਹੀਂ ਕਿਸਨੇ ਭੇਜੇ ਹਨ।



ਸੋਫੋਸ ਦੇ ਸੀਨੀਅਰ ਤਕਨੀਕੀ ਸਲਾਹਕਾਰ ਨੇ ਕਿਹਾ ਕਿ ਲੋਕ ਸੋਸ਼ਲ ਨੈਟਵਰਕਿੰਗ ਦੀ ਵੈਬਸਾਈਟਸ ਤੇ ਜਿਆਦਾ ਸਮਾਂ ਬਿਤਾ ਰਹੇ ਹਨ, ਸੰਵੇਦਨਸ਼ੀਲ ਜਾਣਕਾਰੀ ਅਤੇ ਆਪਣੀਆਂ ਵਿਅਕਤੀਗਤ ਸੂਚਨਾਵਾਂ ਵੰਡ ਰਹੇ ਹਨ।



ਹੈਕਰਾਂ ਨੂੰ ਪਤਾ ਲੱਗ ਗਿਆ ਹੈ ਕਿ ਇੱਥੋਂ ਪੈਸਾ ਬਣਾਇਆ ਜਾ ਸਕਦਾ ਹੈ। ਸੋਫੋਸ ਦੇ ਅਨੁਸਾਰ ਯੂਜ਼ਰਸ ਦੇ ਫੋਟੋ ਇਸਤੇਮਾਲ ਕੀਤੇ ਜਾ ਸਕਦੇ ਹਨ, ਉਹਨਾਂ ਦੀਆਂ ਵਿਅਕਤੀਗਤ ਜਾਣਕਾਰੀਆਂ ਵਪਾਰਿਕ ਹਿੱਤਾਂ ਲਈ ਹੋਰ ਫਰਮਾਂ ਨੂੰ ਵੇਚੀਆਂ ਜਾ ਸਕਦੀਆਂ ਹਨ।



ਮਸ਼ਹੂਰ ਵੈਬਸਾਈਟ ਫੇਸਬੁੱਕ ਨੇ ਇਹਨਾਂ ਮੁਸ਼ਕਲਾਂ ਤੋਂ ਛੁਟਕਾਰਾ ਪਾਉਣ ਲਈ ਇੰਟਰਨੈਟ ਸਕਿਓਰਿਟੀ ਫਰਮ ਮੈਕਫੀ ਨਾਲ ਕਰਾਰ ਕੀਤਾ ਹੈ। ਫੇਸਬੁੱਕ ਨੇ ਐਲਾਨ ਕੀਤਾ ਹੈ ਕਿ ਉਹ ਆਪਣੇ ਯੂਜ਼ਰਸ ਨੂੰ ਪਹਿਲੇ ਛੇ ਮਹੀਨੇ ਮੁਫ਼ਤ ਅਤੇ ਫਿਰ ਰਿਆਇਤੀ ਦਰਾਂ ਤੇ ਐਂਟੀਵਾਇਰਸ ਮੈਕਫੀ ਮੁਹੱਈਆ ਕਰਾਵੇਗੀ। ਇਸਦਾ ਇਸਤੇਮਾਲ ਕਰਨ ਵਾਲੇ ਲੋਕਾਂ ਨੂੰ ਕੰਪਿਊਟਰ ਚੋਂ ਵਾਇਰਸ ਕੱਢਣ ਦਾ ਟੂਲ ਵੀ ਮਿਲੇਗਾ।



ਪਰ ਸੱਚਾਈ ਇਹੀ ਹੈ ਕਿ ਫੇਸਬੁੱਕ ਵਰਗੇ ਸੋਸ਼ਲ ਨੈਟਵਰਕ ਨੂੰ ਅਜਿਹੇ ਖਤਰਿਆਂ ਤੋਂ ਬਚਾਉਣ ਲਈ ਸਖ਼ਤ ਮਿਹਨਤ ਕਰਨੀ ਪੈਂਦੀ ਹੈ। 35 ਕਰੋੜ ਯੂਜ਼ਰਸ 'ਤੇ ਨਜ਼ਰ ਰੱਖਣਾ ਕਿਸੇ ਲਈ ਸੌਖਾ ਕੰਮ ਨਹੀਂ ਹੈ।