|
ਪਾਸ਼ ਨਾਲੋਂ ਦਾਸ ਤਿੰਨ ਗੁਣਾ ਵੱਧ ਅਮੀਰ
Date: Jan 12, 2012
ਲੰਬੀ, 11 ਜਨਵਰੀ-(ਪ,ਪ)
ਗੁਰਦਾਸ ਸਿੰਘ ਬਾਦਲ ਆਪਣੇ ਵੱਡੇ ਭਰਾ ਪ੍ਰਕਾਸ਼ ਸਿੰਘ ਬਾਦਲ ਨਾਲੋਂ ਤਿੰਨ ਗੁਣਾ ਵੱਧ ਅਮੀਰ ਹਨ ਅਤੇ ਉਨ੍ਹਾਂ ਕੋਲ ਇੱਕ ਇਨੋਵਾ ਗੱਡੀ ਵੀ ਹੈ ਉਂਜ, ਉਨ੍ਹਾਂ ਦੇ ਸਿਰ ਲਗਪਗ ਸਵਾ ਕਰੋੜ ਰੁਪਏ ਦੀਆਂ ਦੇਣਦਾਰੀਆਂ ਵੀ ਹਨ।
ਗੁਰਦਾਸ ਸਿੰਘ ਬਾਦਲ 19,71,45,625 ਰੁਪਏ ਦੀ ਚੱਲ ਅਤੇ ਅਚੱਲ ਜਾਇਦਾਦ ਦੇ ਮਾਲਕ ਹਨ। ਇਸ ਵਿੱਚ 19,57,70,548 ਦੀ ਉਨ੍ਹਾਂ ਕੋਲ ਪੁਸ਼ਤੈਨੀ ਚੱਲ-ਅਚੱਲ ਜਾਇਦਾਦ ਹੈ ਜਦੋਂਕਿ 13 ਲੱਖ 75 ਹਜ਼ਾਰ ਰੁਪਏ ਦੀ ਉਨ੍ਹਾਂ ਦੇ ਕੋਲ ਨਿੱਜੀ ਰਕਮ ਹੈ। ਇਸ ਵਿਚੋਂ 3 ਲੱਖ ਰੁਪਏ ਨਕਦ ਅਤੇ 10 ਲੱਖ 75 ਹਜਾਰ ਰੁਪਏ ਦੀ ਰਾਸ਼ੀ ਵੱਖ-ਵੱਖ ਬੈਂਕਾਂ ਵਿੱਚ ਜਮ੍ਹਾਂ ਹੈ। ਉਨ੍ਹਾਂ ਦੀ ਪਤਨੀ ਸ੍ਰੀਮਤੀ ਹਰਮਿੰਦਰ ਕੌਰ ਦੇ ਕੋਲ 2,16,44,764 ਰੁਪਏ ਦੀ ਚੱਲ-ਅਚੱਲ ਜਾਇਦਾਦ ਹੈ। ਸ੍ਰੀ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਪੀ.ਪੀ.ਪੀ. ਉਮੀਦਵਾਰ ਵਜੋਂ ਦਾਖਲ ਨਾਮਜ਼ਦਗੀ ਕਾਗਜ਼ਾਂ ਨਾਲ ਆਪਣੀ ਆਮਦਨ ਅਤੇ ਜਾਇਦਾਦ ਦੇ ਅਸਾਸਿਆਂ ਦੀ ਸੂਚੀ ਅਨੁਸਾਰ ਪੁਸ਼ਤੈਨੀ ਤੌਰ ‘ਤੇ ਉਨ੍ਹਾਂ ਕੋਲ ਇਕ ਲੱਖ ਰੁਪਏ ਅਤੇ ਨਿੱਜੀ ਤੌਰ ‘ਤੇ 3 ਲੱਖ ਰੁਪਏ ਦੀ ਨਕਦ ਰਾਸ਼ੀ ਹੈ। ਵੱਖ-ਵੱਖ ਬੈਂਕਾਂ ਵਿੱਚ ਪੁਸ਼ਤੈਨੀ ਤੌਰ ‘ਤੇ 4 ਲੱਖ 939 ਰੁਪਏ ਅਤੇ ਨਿੱਜੀ ਤੌਰ ‘ਤੇ 10 ਲੱਖ 75 ਹਜ਼ਾਰ 77 ਰੁਪਏ ਜਮ੍ਹਾਂ ਹਨ ਜਦੋਂਕਿ ਉਨ੍ਹਾਂ ਨੇ 20 ਲੱਖ 31 ਹਜ਼ਾਰ 84 ਰੁਪਏ ਕਰਜ਼ੇ ਵਜੋਂ ਦਿੱਤੇ ਹੋਏ ਹਨ। ਗੁਰਦਾਸ ਬਾਦਲ ਕੋਲ ਇਨੋਵਾ ਗੱਡੀ ਤੋਂ ਇਲਾਵਾ ਜੌਹਨ ਡੀਅਰ ਅਤੇ ਮੈਸੀ ਟਰੈਕਟਰ ਵੀ ਹਨ ਜਿਨ੍ਹਾਂ ਦੀ ਕੀਮਤ 22 ਲੱਖ 68 ਹਜ਼ਾਰ 525 ਰੁਪਏ ਹੈ। ਉਨ੍ਹਾਂ ਕੋਲ 2 ਲੱਖ 85 ਹਜ਼ਾਰ ਰੁਪਏ ਦਾ ਪੁਸ਼ਤੈਨੀ ਸੋਨਾ ਹੈ। ਅਚੱਲ ਜਾਇਦਾਦ ਵਿੱਚ ਉਨ੍ਹਾਂ ਦੇ ਕੋਲ 3 ਕਰੋੜ 29 ਲੱਖ 97 ਹਜ਼ਾਰ 500 ਰੁਪਏ ਦੀ ਕੀਮਤ ਦੀ ਪਿੰਡ ਬਾਦਲ ਵਿੱਚ 163 ਕਨਾਲ ਜ਼ਮੀਨ, ਰਾਜਸਥਾਨ ਦੇ ਪਿੰਡ 3ਬੀ.ਐਨ.ਵੀ. ਵਿੱਚ 37.47 ਵਿੱਘਾ ਜ਼ਮੀਨ ਅਤੇ ਰਾਜਸਥਾਨ ਦੇ ਹੀ ਪਿੰਡ 5 ਬੀ.ਐਨ.ਵੀ. ਵਿੱਚ 24 ਵਿੱਘਾ ਵਾਹੀਯੋਗ ਜ਼ਮੀਨ ਹੈ ਜਦੋਂਕਿ ਕਰਮਸ਼ੀਅਲ ਇਮਾਰਤਾਂ ਵਿੱਚ 8 ਕਰੋੜ 21 ਲੱਖ 37 ਹਜ਼ਾਰ 500 ਰੁਪਏ ਦੀ ਜੱਦੀ-ਪੁਸ਼ਤੀ ਜਾਇਦਾਦ ਹੈ। ਇਸ ਵਿੱਚ ਚੰਡੀਗੜ੍ਹ ਵਿਖੇ ਦੋ ਸ਼ਾਪ-ਕਮ-ਫਲੈਟ ਅਤੇ ਕਿੱਲਿਆਂਵਾਲੀ ਵਿਖੇ ਇੱਕ ਇਮਾਰਤ ਵਿਚ ਹਿੱਸਾ ਸ਼ਾਮਲ ਹੈ। ਉਨ੍ਹਾਂ ਕੋਲ ਪਿੰਡ ਬਾਦਲ ਵਿੱਚ 8 ਲੱਖ ਰੁਪਏ ਅਤੇ ਚੰਡੀਗੜ੍ਹ ਵਿੱਚ 7 ਕਰੋੜ 47 ਲੱਖ 50 ਹਜ਼ਾਰ ਰੁਪਏ ਦੀ ਕੀਮਤ ਦੇ ਮਕਾਨ ਹਨ। ਕਰੋੜਾਂ ਦੇ ਮਾਲਕ ਹੋਣ ਦੇ ਬਾਵਜੂਦ ਉਨ੍ਹਾਂ ਵੱਲ ਵੱਖ-ਵੱਖ ਬੈਂਕਾਂ ਅਤੇ ਹੋਰ ਅਦਾਰਿਆਂ ਦੀਆਂ ਇਕ ਕਰੋੜ 22 ਲੱਖ 15 ਹਜ਼ਾਰ 702 ਰੁਪਏ ਦੀਆਂ ਦੇਣਦਾਰੀਆਂ ਵੀ ਹਨ। ਉਨ੍ਹਾਂ ਪਤਨੀ ਸ੍ਰੀਮਤੀ ਹਰਮਿੰਦਰ ਕੌਰ 24 ਲੱਖ 57 ਲੱਖ 264 ਰੁਪਏ ਦੀ ਚੱਲ ਜਾਇਦਾਦ ਤੋਂ ਇਲਾਵਾ ਇਕ ਕਰੋੜ 20 ਲੱਖ ਰੁਪਏ ਦੀ ਵਾਹੀਯੋਗ ਜ਼ਮੀਨ ਅਤੇ 71 ਲੱਖ 87 ਹਜ਼ਾਰ 500 ਰੁਪਏ ਦੀ ਕਮਰਸ਼ਲ ਅਚੱਲ ਜਾਇਦਾਦ ਦੀ ਮਾਲਕਣ ਹਨ।
|
Total Views: 9075 |
