ਮੈਸੀ ਬਣਿਆ ਤੀਜੀ ਵਾਰ ਦੁਨੀਆਂ ਦਾ ਸਰਵੋਤਮ ਫੁਟਬਾਲਰ

Date: Jan 11, 2012

ਜਿਊਰਿਖ, 10 ਜਨਵਰੀ-(ਪ,ਪ)

ਅਰਜਨਟੀਨਾ ਦੇ ਖਿਡਾਰੀ ਲਿਓਨੇਲ ਮੈਸੀ ਨੂੰ ਜਿਊਰਿਖ ‘ਚ ਸਿਤਾਰਿਆਂ ਨਾਲ ਸਜੇ ਸਮਾਰੋਹ ‘ਚ ਕੱਲ੍ਹ ਲਗਾਤਾਰ ਤੀਜੀ ਵਾਰ ਸਾਲ ਦਾ ਸਰਵੋਤਮ ਫੁਟਬਾਲਰ ਚੁਣਿਆ ਗਿਆ। ਇਸ ਲਈ ਉਸ ਨੂੰ ਫੀਫਾ 2011 ਬੈਲੋਨ ਡੇਅ ‘ਤੇ ਟਰਾਫੀ ਦਿੱਤੀ ਗਈ।

ਅਰਜਨਟੀਨਾ ਤੇ ਬਾਰਸੀਲੋਨਾ ਦੇ ਇਸ 24 ਸਾਲਾ ਸਟਰਾਈਕਰ ਨੇ ਇਸ ਪੁਰਸਕਾਰ ਦੀ ਦੌੜ ‘ਚ ਰੀਆਲ ਮੈਡਰਿਡ ਦੇ ਆਪਣੇ ਵਿਰੋਧੀ ਕ੍ਰਿਸਟਿਆਨੋ ਰੋਨਾਲਡੋ ਤੇ ਬਾਰਸੀਲੋਨਾ ਦੇ ਆਪਣੇ ਸਾਥੀ ਝਾਵੀ ਨੂੰ ਪਿੱਛੇ ਛੱਡਿਆ ਹੈ। ਇਸ ਪ੍ਰਾਪਤੀ ਬਾਰੇ ਮੈਸੀ ਦਾ ਕਹਿਣਾ ਹੈ ਕਿ ਇਹ ਉਸ ਲਈ ਬੇਹੱਦ ਖੁਸ਼ੀ ਦੀ ਗੱਲ ਹੈ। ਉਸ ਨੇ ਤੀਜੀ ਵਾਰ ਇਹ ਸਨਮਾਨ ਹਾਸਲ ਕੀਤਾ ਹੈ। ਯੂ.ਏ.ਫਾ. ਦੇ ਮੌਜੂਦਾ ਪ੍ਰਧਾਨ ਮਾਈਕਲ ਪਲਾਟਿਨੀ ਤੋਂ ਬਾਅਦ ਮੈਸੀ ਸਿਰਫ ਦੂਜਾ ਖਿਡਾਰੀ ਹੈ ਜਿਸ ਨੂੰ ਲਗਾਤਾਰ ਤੀਜੇ ਸਾਲ ਇਹ ਪੁਰਸਕਾਰ ਦਿੱਤਾ ਗਿਆ ਹੈ। ਇਸ ਦੇ ਨਾਲ ਹੀ ਉਹ ਪਲਾਟਿਨੀ, ਲੋਹਾਨ ਕਰੂਏਫ ਤੇ ਮਾਰਕੋ ਵਾਨ ਬਾਸਟੇਨ ਦੀ ਲੜੀ ‘ਚ ਵੀ ਸ਼ਾਮਲ ਹੋ ਗਿਆ ਹੈ ਜਿਨ੍ਹਾਂ ਨੂੰ ਤਿੰਨ ਵਾਰ ਸਾਲ ਦਾ ਸਰਵੋਤਮ ਫੁਟਬਾਲਰ ਚੁਣਿਆ ਗਿਆ ਸੀ।

ਮੈਸੀ ਨੇ ਫੀਫਾ ਬੈਲੋਨ ਡੇ ਤੇ ਗਾਲਾ ‘ਚ ਮੌਜੂਦ ਆਪਣੇ ਕਲੱਬ ਦੇ ਸਾਥੀ ਖਿਡਾਰੀਆਂ ਨੂੰ ਮੁਖਾਤਬ ਹੁੰਦਿਆਂ ਕਿਹਾ ਕਿ ਉਹ ਇਸ ਸਨਮਾਨ ਨੂੰ ਆਪਣੇ ਸਾਥੀ ਝਾਵੀ ਨਾਲ ਵੰਡਣਾ ਚਾਹੁੰਦਾ ਹੈ। ਉਹ ਵੀ ਇਸ ਦਾ ਹੱਕਦਾਰ ਹੈ। ਪਹਿਲਾਂ ਇਹ ਫੀਫਾ ਸਾਲ ਦਾ ਸਰਵੋਤਮ ਖਿਡਾਰੀ ਪੁਰਸਕਾਰ ਹੁੰਦਾ ਸੀ ਪਰ 2010 ਬੈਲੋਨ ਡੇ ਨਾਲ ਇਸ ਦਾ ਰਲੇਵਾਂ ਹੋ ਗਿਆ ਸੀ। ਇਸ ਪੁਰਸਕਾਰ ਲਈ ਖਿਡਾਰੀਆਂ ਦੀ ਚੋਣ ਕੌਮੀ ਟੀਮਾਂ ਦੇ ਕੋਚ ਤੇ ਕਪਤਾਨ ਫਰਾਂਸ ਫੁਟਬਾਲ ਅਖਬਾਰ ਵੱਲੋਂ ਚੁਣੇ ਫੁਟਬਾਲ ਪੱਤਰਕਾਰ ਕਰਦੇ ਹਨ। ਮੈਸੀ ਸ਼ੁਰੂ ਤੋਂ ਹੀ ਇਸ ਦਾ ਦਾਅਵੇਦਾਰ ਸੀ। ਉਸ ਦੀ ਅਗਵਾਈ ‘ਚ ਬਾਰਸੀਲੋਨਾ ਨੇ ਪੰਜ ਖਿਤਾਬ ਜਿੱਤੇ ਜਿਸ ‘ਚ ਚੈਂਪੀਅਨਜ਼ ਲੀਗ, ਫੀਫਾ ਕਲੱਬ ਵਿਸ਼ਵ ਕੱਪ ਤੇ ਲਗਾਤਾਰ ਤੀਜਾ ਖਿਤਾਬ ਸ਼ਾਮਲ ਹਨ।