ਲਾਪਤਾ ਪੰਜਾਬੀ ਵਿਦਿਆਰਥੀ ਦੀ ਲਾਸ਼ ਮਿਲੀ

ਲੰਡਨ, 10 ਜਨਵਰੀ-(ਪ,ਪ)

ਭਾਰਤੀ ਮੂਲ ਦੇ ਲਾਪਤਾ ਵਿਦਿਆਰਥੀ ਗੁਰਦੀਪ ਹੇਅਰ (20) ਦੀ ਲਾਸ਼ ਉਸ ਦੇ ਲਾਪਤਾ ਹੋਣ ਤੋਂ ਬਾਅਦ ਅੱਜ ਮਾਨਚੈਸਟਰ ਤੋਂ ਮਿਲੀ ਹੈ। ਗੁਰਦੀਪ 2 ਜਨਵਰੀ ਤੋਂ ਲਾਪਤਾ ਸੀ। ਯੂ.ਕੇ. ਪੁਲੀਸ ਨੇ ਦੱਸਿਆ ਕਿ ਕੱਲ੍ਹ ਮਾਨਚੈਸਟਰ ਦੇ ਮੈੱਡਲਾਕ ਦਰਿਆ ’ਚ ਮਿਲੀ ਲਾਸ਼ ਦੀ ਪਛਾਣ ਗੁਰਦੀਪ ਹੇਅਰ ਵਜੋਂ ਹੋਈ। ਦਿ ਗ੍ਰੇਟਰ ਮਾਨਚੈਸਟਰ ਪੁਲੀਸ ਵੀ ਉਸ ਦੀ ਭਾਲ ’ਚ ਜੁਟੀ ਹੋਈ ਸੀ। ਮ੍ਰਿਤਕ ਦੀ ਪੋਸਟਮਾਰਟਮ ਦੀ ਰਿਪੋਰਟ ਆਉਣੀ ਅਜੇ ਬਾਕੀ ਹੈ। ਇਸ ਤੋਂ ਇਲਾਵਾ ਪੁਲੀਸ ਨੇ ਉਸ ਦੀ ਮੌਤ ਬਾਰੇ ਹੋਰ ਕੋਈ ਜਾਣਕਾਰੀ ਨਹੀਂ ਦਿੱਤੀ। ਗੁਰਦੀਪ ਨੂੰ ਆਖਰੀ ਵਾਰ 2 ਜਨਵਰੀ ਨੂੰ ਦਿ ਗ੍ਰੇਟਰ ਮਾਨਚੈਸਟਰ ਵਿਖੇ ਸੈਨਕੀਜ਼ ਨਾਈਟ ਕਲੱਬ ਦੇ ਬਾਹਰ ਇਕ ਟੈਕਸੀ ਡਰਾਈਵਰ ਵੱਲੋਂ ਦੇਖਿਆ ਗਿਆ ਸੀ ਜਿਸ ਨੂੰ ਗੁਰਦੀਪ ਨੇ ਰਸ਼ਓਲਮ ਵਿਖੇ ਛੱਡਣ ਲਈ ਕਿਹਾ ਪਰ ਉਹ ਰਸਤੇ ਵਿੱਚ ਹੀ ਵਿਕਟੋਰੀਆ ਬਾਥਜ਼ ਕੋਲ ਹੈਥਰਸੇਜ ਰੋਡ ’ਤੇ ਉਤਰ ਗਿਆ। ਗੁਰਦੀਪ ਦੀ ਮਾਤਾ ਦੀ ਸ਼ਿਕਾਇਤ ’ਤੇ ਪੁਲੀਸ ਨੇ ਉਸ ਦੇ ਲਾਪਤਾ ਹੋਣ ਦਾ ਮਾਮਲਾ ਦਰਜ ਕਰਕੇ ਉਸ ਦੀ ਭਾਲ ਸ਼ੁਰੂ ਕਰ ਦਿੱਤੀ ਅਤੇ ਅੱਜ ਉਸ ਦੀ ਲਾਸ਼ ਮਿਲੀ ਹੈ। ਲਾਪਤਾ ਹੋਣ ਤੋਂ ਬਾਅਦ ਉਸ ਦੇ ਮਾਪਿਆਂ ਨੇ ਉਸ ਦੀ ਭਾਲ ਲਈ ਬੇਅੰਤ ਕੋਸ਼ਿਸ਼ਾਂ ਕੀਤੀਆਂ। ਪੂਰੇ ਮਾਨਚੈਸਟਰ ਵਿੱਚ ਉਸ ਦੀਆਂ ਤਸਵੀਰਾਂ ਵਾਲੇ ਪੋਸਟਰ ਲਾਏ ਅਤੇ ਫੇਸਬੁੱਕ ’ਤੇ ਵੀ ਉਸ ਦੀ ਭਾਲ ’ਚ ਸਹਾਇਤਾ ਦੀ ਮੰਗ ਕਰਦਿਆਂ ਇੱਕ ਪੇਜ਼ ਬਣਾਇਆ। ਗੁਰਦੀਪ ਦੀ ਮਾਤਾ ਨੇ ਦੱਸਿਆ ਕਿ ਉਹ ਇੱਕ ਜ਼ਿੰਮੇਵਾਰ ਲੜਕਾ ਸੀ ਤੇ ਹਮੇਸ਼ਾ ਸਮੇਂ-ਸਮੇ ’ਤੇ ਆਪਣੇ ਬਾਰੇ ਫੋਨ ਰਾਹੀਂ ਮਾਪਿਆਂ ਨੂੰ ਸੂਚਿਤ ਕਰਦਾ ਰਹਿੰਦਾ ਸੀ।