ਛਤਵਾਲ ਹੋਟਲਜ਼ ਐਂਡ ਰਿਜ਼ੌਰਟਸ ਵੱਲੋਂ ਭਾਰਤ ਵਿੱਚ 100 ਹੋਟਲ ਖੋਲ੍ਹਣ ਦੀ ਤਿਆਰੀ

Date: Jan 10, 2012

ਨਵੀਂ ਦਿੱਲੀ, 9 ਜਨਵਰੀ-(ਪ,ਪ)

ਅਮਰੀਕਾ ਵਿਚ ਵਸਦੇ ਅਮੀਰ ਪੰਜਾਬੀ ਪਰਵਾਸੀ ਸੰਤ ਸਿੰਘ ਛਤਵਾਲ (ਸੱਜੇ) ਤੇ ਉਨ੍ਹਾਂ ਦਾ ਬੇਟਾ ਵਿਕਰਮ ਛਤਵਾਲ (ਖੱਬੇ) ਸੋਮਵਾਰ ਨੂੰ ਨਵੀਂ ਦਿੱਲੀ ’ਚ ਵਿੰਡਹੋਮ ਹੋਟਲ ਗਰੁੱਪ ਦੇ ਪ੍ਰਧਾਨ ਤੇ ਸੀ.ਈ.ਓ. ਐਰਿਕ ਡਾਂਜੀਗਰ ਨਾਲ ਕਾਰੋਬਾਰ ਦੀ ਭਾਈਵਾਲੀ ਦੀ ਖੁਸ਼ੀ ਸਾਂਝੇ ਕਰਦੇ ਹੋਏ। (ਫੋਟੋ: ਪੀ.ਟੀ.ਆਈ.)

ਨਿਊਯਾਰਕ ਦੇ ਛਤਵਾਲ ਹੋਟਲ ਅਤੇ ਰਿਜ਼ਾਰਟ ਵੱਲੋਂ ਭਾਰਤ ’ਚ ਆਪਣਾ ਕਾਰੋਬਾਰ ਵਧਾਉਣ ਲਈ 2000 ਕਰੋੜ ਰੁਪਏ ਨਿਵੇਸ਼ ਕਰਕੇ ਆਪਣੇ ਭਾਈਵਾਲ ਵਿੰਧਮ ਹੋਟਲ ਗਰੁੱਪ ਨਾਲ ਆਉਣ ਵਾਲੇ 10 ਸਾਲਾਂ ਦੌਰਾਨ 100 ਹੋਟਲ ਖੋਲ੍ਹਣ ਦੀ ਯੋਜਨਾ ਬਣਾਈ ਜਾ ਰਹੀ ਹੈ।

ਹੈਂਪਸ਼ਾਇਰ ਹੋਟਲਜ਼ ਅਤੇ ਰਿਜ਼ਾਰਟ ਦੇ ਚੇਅਰਮੈਨ ਅਤੇ ਸੀ.ਈ.ਓ. ਸੰਤ ਸਿੰਘ ਛਤਵਾਲ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਆਉਣ ਵਾਲੇ ਪੰਜ ਸਾਲਾਂ ਵਿੱਚ ਉਨ੍ਹਾਂ ਵੱਲੋਂ ਭਾਰਤ ’ਚ 52 ਹੋਟਲ ਖੋਲ੍ਹਣ ਦੀ ਪੱਕੀ ਯੋਜਨਾ ਤਿਆਰ ਹੋ ਚੁੱਕੀ ਹੈ ਅਤੇ ਆਉਣ ਵਾਲੇ 10 ਸਾਲਾਂ ਵਿੱਚ ਉਨ੍ਹਾਂ ਨੂੰ ਇੱਥੇ 100 ਹੋਟਲ ਖੋਲ੍ਹਣ ਦੀ ਉਮੀਦ ਹੈ। ਛਤਵਾਲ ਅਤੇ ਵਿੰਧਮ ਵੱਲੋਂ ਆਉਂਦੇ 10 ਸਾਲਾਂ ਵਿੱਚ ਵਿਸ਼ਵ ਭਰ ਵਿੱਚ 500 ਹੋਟਲ ਸਥਾਪਤ ਕਰਨ ਦੀ ਤਿਆਰੀ ਹੈ।

ਸ੍ਰੀ ਛਤਵਾਲ ਨੇ ਭਾਰਤ ਵਿੱਚ ਆਪਣੇ ਹੋਟਲ ਕਾਰੋਬਾਰ ਬਾਰੇ ਦੱਸਿਆ ਕਿ 40 ਹੋਟਲ ‘ਨਾਈਟ’ ਬਰਾਂਡ ਤਹਿਤ ਤੇ 12 ਹੋਟਲ ‘ਡਰੀਮ’ ਬਰਾਂਡ ਤਹਿਤ ਖੋਲ੍ਹੇ ਜਾ ਰਹੇ ਹਨ ਜਿਨ੍ਹਾਂ ਵਿੱਚੋਂ 18 ਹੋਟਲਾਂ ਬਾਰੇ ਪੂਰੀ ਤਿਆਰੀ ਕੀਤੀ ਜਾ ਚੁੱਕੀ ਹੈ। ਇਸ ਯੋਜਨਾ ’ਤੇ ਉਹ 2,000 ਕਰੋੜ ਰੁਪਏ ਖਰਚ ਰਹੇ ਹਨ। -ਪੀ.ਟੀ.ਆਈ.