ਈਅਰਫੋਨ ਦੇ ਲਈ ਦੀਵਾਨਗੀ ਬਣਾ ਸਕਦੀ ਹੈ ਬੋਲ਼ਾ

Date: May 30, 2011

ਨਵੀਂ ਦਿੱਲੀ, 29 ਮਈ (ਭਾਸ਼ਾ)¸

ਅਤਿ ਆਧੁਨਿਕ ਟੈਕਨਾਲੋਜੀ ਪ੍ਰਤੀ ਨੌਜਵਾਨਾਂ ਦੀ ਵਧਦੀ ਦੀਵਾਨਗੀ ਦੀ ਝਲਕ ਉਨ੍ਹਾਂ ਦੇ ਸਭ ਤੋਂ ਨਵੇਂ ਮਾਡਲ ਦੇ ਮੋਬਾਈਲ ਫੋਨ ਜਾਂ ਆਈਪੋਡ ਤੋਂ ਮਿਲਦੀ ਹੈ ਜਿਨ੍ਹਾਂ ਉਪਰ ਉਹ ਐੱਮ. ਪੀ. 3 ਪਲੇਅਰ ਜਾਂ ਐੱਫ. ਐੱਮ. ਰੇਡੀਓ ਦੇ ਜ਼ਰੀਏ ਪਸੰਦੀਦਾ ਸੰਗੀਤ ਦਾ ਕੰਨਾਂ ਵਿਚ ਈਅਰਫੋਨ ਲਗਾ ਕੇ ਮਜ਼ਾ ਲੈਂਦੇ ਹਨ ਪਰ ਈਅਰਫੋਨ ਦੇ ਲਈ ਉਨ੍ਹਾਂ ਦਾ ਇਹ ਲਗਾਅ ਉਨ੍ਹਾਂ ਨੂੰ ਬੋਲਾ ਵੀ ਬਣਾ ਸਕਦਾ ਹੈ। ਈ. ਐੱਨ. ਟੀ. (ਕੰਨ, ਨੱਕ ਅਤੇ ਗਲਾ ਰੋਗ) ਮਾਹਿਰ ਡਾ. ਗੋਬਿੰਦ ਪ੍ਰਭੂ ਦਾ ਕਹਿਣਾ ਹੈ, ”ਜਿਸ ਬੱਸ ਸਟੈਂਡ, ਦੁਕਾਨ, ਪਾਰਕ ਜਿਥੇ ਵੀ ਦੇਖੋ, ਕੰਨਾਂ ਵਿਚ ਈਅਰਫੋਨ ਤੇ ਸੰਗੀਤ ਸੁਣਦੇ ਨੌਜਵਾਨ ਨਜ਼ਰ ਆਉਂਦੇ ਹਨ ਪਰ ਇਨ੍ਹਾਂ ਫੋਨਾਂ ਨਾਲ ਕੰਨਾਂ ਨੂੰ ਸੰਗੀਤ ਚੰਗੀ ਤਰ੍ਹਾਂ ਨਹੀਂ ਸੁਣਾਈ ਦਿੰਦਾ ਕਿਉਂਕਿ ਉਹ ਪੂਰੀ ਤਰ੍ਹਾਂ ਕਵਰ ਨਹੀਂ ਕਰਦੇ। ਇਸ ਦੇ ਕਾਰਨ ਲੋਕ ਇਸ ਦੀ ਆਵਾਜ਼ ਤੇਜ਼ ਕਰ ਦਿੰਦੇ ਹਨ ਅਤੇ ਇਹ ਹੀ ਗੱਲ ਨੁਕਸਾਨਦਾਇਕ ਹੁੰਦੀ ਹੈ।” ਉਨ੍ਹਾਂ ਦੱਸਿਆ ਕਿ ਲੰਮੇ ਸਮੇਂ ਤਕ ਤੇਜ਼ ਆਵਾਜ਼ ਸੁਣਨ ਦੇ ਕਾਰਨ ਸੁਣਨ ਦੀ ਸਮਰੱਥਾ ‘ਤੇ ਵੀ ਅਸਰ ਪੈਂਦਾ ਹੈ ਕਿਉਂਕਿ ਤੇਜ਼ ਆਵਾਜ਼ ਕੰਨ ਦੇ ਪਰਦੇ ਨੂੰ ਨੁਕਸਾਨ ਪਹੁੰਚਾ ਕੇ ਉਸ ਨੂੰ ਪਤਲਾ ਕਰ ਦਿੰਦੀ ਹੈ। ਈ. ਐੱਨ. ਟੀ. ਮਾਹਿਰ ਡਾ. ਦੀਪ ਚੰਦ ਗੁਪਤਾ ਕਹਿੰਦੇ ਹਨ ਕਿ ਆਮ ਕਰਕੇ ਲੋਕਾਂ ਦੇ ਸੁਣਨ ਦੀ ਸਮਰੱਥਾ 50 ਸਾਲ ਦੀ ਉਮਰ ਵਿਚ ਪ੍ਰਭਾਵਿਤ ਹੁੰਦੀ ਹੈ ਪਰ ਇਹ ਸਮੱਸਿਆ ਨੌਜਵਾਨਾਂ ਵਿਚ ਵੀ ਹੋ ਰਹੀ ਹੈ ਅਤੇ ਇਸ ਦਾ ਕਾਰਨ ਉੱਚੀ ਆਵਾਜ਼ ਵਿਚ ਐੱਮ. ਪੀ. 3 ਜਾਂ ਆਈਪੋਡ ਸੁਣਨਾ ਹੈ। ਡਾ. ਗੁਪਤਾ ਕਹਿੰਦੇ ਹਨ, ”ਤੇਜ਼ ਆਵਾਜ਼ ਦੇ ਕਾਰਨ ਸ਼ੁਰੂ ਵਿਚ ਕੰਨਾਂ ਦੀਆਂ ਰੋਮ ਗ੍ਰੰਥੀਆਂ ਅਸਥਾਈ ਰੂਪ ਵਿਚ ਨੁਕਸਾਨੀਆਂ ਜਾਂਦੀਆਂ ਹਨ ਪਰ ਇਹ ਮੁਰੰਮਤ ਵੀ ਕਰ ਲੈਂਦੀਆਂ ਹਨ ਜਾਂ ਇਲਾਜ ਨਾਲ ਇਨ੍ਹਾਂ ਨੂੰ ਠੀਕ ਕੀਤਾ ਜਾ ਸਕਦਾ ਹੈ। ਨੈਚੁਰੋਪੈਥ ਡਾ. ਕੇਸੀ ਗਰਗ ਅਨੁਸਾਰ ਆਧੁਨਿਕ ਰਹਿਣ-ਸਹਿਣ ਦਾ ਢੰਗ ਵੀ ਬੋਲੇਪਨ ਦਾ ਇਕ ਕਾਰਨ ਹੈ। ਕਲੱਬਾਂ, ਪਾਰਟੀਆਂ ਅਤੇ ਤੇਜ਼ ਆਵਾਜ਼ ਦੇ ਸੰਗੀਤ ਦੇ ਕਾਰਨ ਸੁਣਨ ਦੀ ਸਮਰੱਥਾ ਕਮਜ਼ੋਰ ਹੋ ਜਾਂਦੀ ਹੈ।