|
ਰੂੰ ਦੀਆਂ ਕੀਮਤਾਂ ਦੇ ਮੰਦੇ ਨਾਲ ਕਤਾਈ ਮਿੱਲਾਂ ਨੂੰ ਅਰਬਾਂ ਦਾ ਨੁਕਸਾਨ
Date: May 28, 2011
ਜੈਤੋ, 27 ਮਈ (ਪ,ਪ)¸
ਦੇਸ਼ ਦੇ ਕਪਾਹ ਉਤਪਾਦਕ ਰਾਜਾਂ ਦੀਆਂ ਮੰਡੀਆਂ ‘ਚ ਅੱਜਕਲ ਰੂੰ ਦੀਆਂ ਕੀਮਤਾਂ ‘ਚ ਭਾਰੀ ਮੰਦੀ ਆ ਚੁੱਕੀ ਹੈ। ਇਹ ਗਿਰਾਵਟ ਕੇਂਦਰ ਸਰਕਾਰ ਦੀਆਂ ਗਲਤ ਨੀਤੀਆਂ ਦੇ ਕਾਰਨ ਆਈ ਹੈ। ਇਹ ਗੱਲ ਪੰਜਾਬ ਦੇ ਸਾਬਕਾ ਮੰਤਰੀ ਤੇ ਰਾਜ ਵਪਾਰ ਮੰਡਲ ਦੇ ਸੂਬਾਈ ਪ੍ਰਧਾਨ ਮਦਨ ਲਾਲ ਕਪੂਰ ਨੇ ਆਖੀ। ਉਨ੍ਹਾਂ ਕਿਹਾ ਕਿ ਚਾਲੂ ਕਪਾਹ ਸੀਜ਼ਨ ਦੇ ਦੌਰਾਨ ਕੇਂਦਰ ਸਰਕਾਰ ਨੇ ਰੂੰ ਅਤੇ ਧਾਗੇ ਦੇ ਨਿਰਯਾਤ ਦੀ ਸਪੱਸ਼ਟ ਨੀਤੀ ਨਾ ਬਣਨ ਦੇ ਕਾਰਨ ਅੱਜ ਕਤਾਈ ਮਿੱਲਾਂ ਅਤੇ ਕਪਾਹ ਜਿਨਰਾਂ ਨੂੰ ਅਰਬਾਂ ਰੁਪਏ ਦਾ ਨੁਕਸਾਨ ਹੋਇਆ ਹੈ । ਕੇਂਦਰ ਸਰਕਾਰ 15 ਲੱਖ ਗੰਢਾਂ ਰੂੰ ਦੇ ਨਿਰਯਾਤ ਦਾ ਫੈਸਲਾ ਤੁਰੰਤ ਲਵੇ ਤਾਂ ਕਿ ਦੇਸ਼ ਦੀਆਂ ਮਿੱਲਾਂ ਬੰਦ ਹੋਣ ਤੋਂ ਬਚ ਸਕਣ ਅਤੇ ਲੱਖਾਂ ਲੋਕ ਬੇਰੋਜ਼ਗਾਰ ਹੋਣ ਤੋਂ ਬਚ ਜਾਣ। ਕਪੂਰ ਨੇ ਕਿਹਾ ਕਿ ਕੇਂਦਰ ਸਰਕਾਰ ਦੀਆਂ ਗਲਤ ਨੀਤੀਆਂ ਦਾ ਖਮਿਆਜ਼ਾ ਕਤਾਈ ਮਿੱਲਾਂ ਨੂੰ ਭੁਗਤਣਾ ਪਿਆ ਹੈ ਕਿਉਂਕਿ ਕਤਾਈ ਮਿੱਲਾਂ ਮੋਟੇ ਘਾਟੇ ‘ਚ ਪਹੁੰਚ ਗਈਆਂ ਹਨ। ਸਰਕਾਰ ਨੂੰ ਨਿਰਯਾਤ ਨੀਤੀ ਬਣਾਉਣ ਸਮੇਂ ਕਤਾਈ ਮਿਲਰਾਂ, ਟ੍ਰੇਡਰਜ਼ ਆਦਿ ਦੇ ਪ੍ਰਤੀਨਿਧੀਆਂ ਨੂੰ ਸ਼ਾਮਲ ਕਰਨਾ ਚਾਹੀਦਾ ਹੈ ਤਾਂ ਕਿ ਦੇਸ਼ ਦੀਆਂ ਕਤਾਈ ਮਿੱਲਾਂ ਚਾਲੂ ਰਹਿ ਸਕਣ। ਕਪੂਰ ਨੇ ਕਿਹਾ ਕਿ ਬੜੇ ਦੁੱਖ ਦੀ ਗੱਲ ਹੈ ਕਿ ਕੇਂਦਰ ਸਰਕਾਰ ਨੂੰ ਭਾਰਤੀ ਕਤਾਈ ਮਿੱਲਾਂ ਦੀ ਥਾਂ ਵਿਦੇਸ਼ ਦੀਆਂ ਕਤਾਈ ਮਿੱਲਾਂ ਦੀ ਵੱਧ ਚਿੰਤਾ ਰਹਿੰਦੀ ਹੈ।
|
Total Views: 17740 |
