|
ਦਿਲ ਦੇ ਦੌਰੇ ਦੇ ਮੁਢਲੇ ਲੱਛਣ
Date: May 23, 2011
ਹੱਥ ਵਿਚ ਦਰਦ ਹੋਣ ਜਾਂ ਛਾਤੀ ਵਿਚ ਦਰਦ ਹੋਣ ਜਾਂ ਜਲਣ ਹੋਣ ‘ਤੇ ਅਕਸਰ ਲੋਕ ਇਨ੍ਹਾਂ ਨੂੰ ਗੰਭੀਰਤਾ ਨਾਲ ਨਾ ਲੈਂਦੇ ਹੋਏ ਆਪਣੀ ਮਰਜ਼ੀ ਨਾਲ ਕੈਮਿਸਟ ਕੋਲੋਂ ਦਵਾਈ ਲੈ ਕੇ ਖਾ ਲੈਂਦੇ ਹਨ। ਛਾਤੀ ਵਿਚ ਦਰਦ ਜਾਂ ਜਲਨ ਨੂੰ ਤਾਂ ਅਕਸਰ ਬਦਹਜ਼ਮੀ ਕਾਰਨ ਹੋਇਆ ਦਰਦ ਹੀ ਸਮਝਿਆ ਜਾਂਦਾ ਹੈ ਪਰ ਡਾਕਟਰਾਂ ਦਾ ਕਹਿਣਾ ਹੈ ਕਿ ਜੇ ਇਸ ਤਰ੍ਹਾਂ ਦੇ ਲੱਛਣ ਅਕਸਰ ਨਜ਼ਰ ਆਉਣ ਲੱਗਣ ਤਾਂ ਇਸ ਨੂੰ ਹਲਕੇ ਢੰਗ ਨਾਲ ਨਾ ਲੈਂਦਿਆਂ ਗੰਭੀਰਤਾ ਨਾਲ ਧਿਆਨ ਦਿਓ ਅਤੇ ਤੁਰੰਤ ਆਪਣੇ ਡਾਕਟਰ ਤੋਂ ਚੈੱਕਅਪ ਕਰਵਾਓ ਕਿਉਂਕਿ ਇਸ ਤਰ੍ਹਾਂ ਦੇ ਲੱਛਣ ਦਿਲ ਦੀ ਕਿਸੇ ਬੀਮਾਰੀ ਦੇ ਮੁਢਲੇ ਲੱਛਣ ਹੋ ਸਕਦੇ ਹਨ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਛਾਤੀ ਵਿਚ ਜਲਨ ਜਾਂ ਦਰਦ ਹੋਣ ‘ਤੇ ਅਕਸਰ ਲੋਕ ਇਹੋ ਸਮਝਦੇ ਹਨ ਕਿ ਖਾਣ-ਪੀਣ ਵਿਚ ਕੁਝ ਲਾਪ੍ਰਵਾਹੀ ਵਰਤਣ ਕਾਰਨ ਹੀ ਪੇਟ ਦੀ ਗੜਬੜ ਕਾਰਨ ਉਨ੍ਹਾਂ ਨੂੰ ਇਸ ਤਰ੍ਹਾਂ ਦੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਅਤੇ ਇਹੋ ਸੋਚ ਕੇ ਉਹ ਐਸਿਡਿਟੀ ਦੂਰ ਕਰਨ ਵਾਲੀਆਂ ਗੋਲੀਆਂ ਖਾਣੀਆਂ ਸ਼ੁਰੂ ਕਰ ਦਿੰਦੇ ਹਨ ਪਰ ਕੁਝ ਮਾਮਲਿਆਂ ਵਿਚ ਛਾਤੀ ਦੀ ਇਹੀ ਜਲਨ ਦਿਲ ‘ਤੇ ਹੋਣ ਵਾਲੇ ਹਮਲੇ ਦਾ ਮੁਢਲਾ ਸੰਕੇਤ ਵੀ ਹੋ ਸਕਦੀ ਹੈ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਜੇ ਤੁਹਾਨੂੰ ਸਾਹ ਲੈਣ ‘ਚ ਪ੍ਰੇਸ਼ਾਨੀ ਮਹਿਸੂਸ ਹੁੰਦੀ ਹੈ ਤਾਂ ਇਸਨੂੰ ਵੀ ਸਰਦੀ ਜਾਂ ਜੁਕਾਮ ਦਾ ਇਨਫੈਕਸ਼ਨ ਜਾਂ ਫੇਫੜਿਆਂ ਦੀ ਐਲਰਜੀ ਸਮਝ ਕੇ ਲਾਪ੍ਰਵਾਹੀ ਨਾ ਵਰਤੋ ਕਿਉਂਕਿ ਸਾਹ ਲੈਣ ‘ਚ ਪ੍ਰੇਸ਼ਾਨੀ ਦੇ ਇਸ ਤਰ੍ਹਾਂ ਦੇ ਲੱਛਣ ਵੀ ਦਿਲ ਸੰਬੰਧੀ ਕਿਸੇ ਸਮੱਸਿਆ ਦੇ ਮੁਢਲੇ ਸੰਕੇਤ ਹੋ ਸਕਦੇ ਹਨ। ਅੱਜ ਜਿਉਂ-ਜਿਉਂ ਭੱਜ-ਦੌੜ ਵੱਧਦੀ ਜਾ ਰਹੀ ਹੈ, ਮਨੁੱਖ ਤਣਾਅਗ੍ਰਸਤ ਹੁੰਦਾ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਕਸਰਤ ਤੇ ਸਰੀਰਕ ਮਿਹਨਤ ਨਾ ਕਰਨ ਕਰਕੇ ਅਤੇ ਭੋਜਨ ਵਿਚ ਮਸਾਲੇਦਾਰ ਪਕਵਾਨ ਜਾਂ ਫਾਸਟਫੂਡ ਸ਼ਾਮਲ ਹੋਣ ਕਾਰਨ ਵੀ ਦਿਲ ‘ਤੇ ਵਾਧੂ ਦਬਾਅ ਵੱਧ ਰਿਹਾ ਹੈ। ਇਹੋ ਕਾਰਨ ਹੈ ਕਿ ਦਿਲ ਸੰਬੰਧੀ ਬੀਮਾਰੀਆਂ ਦੇ ਖਤਰੇ ਵੀ ਉਸੇ ਰਫਤਾਰ ਨਾਲ ਵੱਧਦੇ ਜਾ ਰਹੇ ਹਨ। ਇਸ ਲਈ ਜ਼ਰੂਰੀ ਹੈ ਕਿ ਜੇ ਤੁਸੀਂ ਹੱਥ, ਗਰਦਨ ਜਾਂ ਲੱਕ ਵਿਚ ਲਗਾਤਾਰ ਦਰਦ, ਛਾਤੀ ਵਿਚ ਜਲਨ ਤੇ ਦਰਦ, ਸਾਹ ਲੈਣ ‘ਚ ਮੁਸ਼ਕਲ, ਸਰੀਰ ‘ਚ ਬੇਚੈਨੀ ਜਾਂ ਆਪਣੇ ਦਿਲ ‘ਤੇ ਅਚਾਨਕ ਦਬਾਅ ਵੱਧਦਾ ਜਾਣਾ ਆਦਿ ਵਰਗੇ ਲੱਛਣ ਮਹਿਸੂਸ ਕਰਨ ਲੱਗੋ ਤਾਂ ਤੁਰੰਤ ਕਿਸੇ ਵਧੀਆ ਡਾਕਟਰ ਤੋਂ ਸਲਾਹ ਲਵੋ ਤਾਂ ਕਿ ਸਮਾਂ ਰਹਿੰਦਿਆਂ ਤੁਸੀਂ ਦਿਲ ਦੇ ਦੌਰੇ ਵਰਗੀ ਗੰਭੀਰ ਬੀਮਾਰੀ ਦੇ ਸ਼ਿਕਾਰ ਹੋਣ ਤੋਂ ਬਚ ਸਕੋ।
¸ਯੋਗੇਸ਼ ਕੁਮਾਰ ਗੋਇਲ
|
Total Views: 17704 |
