ਮਨੋਰੰਜਨ ਜਗਤ ਦੀ ਸਭ ਤੋਂ ਪ੍ਰਭਾਵਸ਼ਾਲੀ ਹਸਤੀ ਹੈ ਲੇਡੀ ਗਾਗਾ

Date: May 20, 2011

ਨਵੀਂ ਦਿੱਲੀ, 19 ਮਈ (ਪ,ਪ)¸

ਆਪਣੇ ਅਜੀਬੋ-ਗਰੀਬ ਅੰਦਾਜ਼ ਲਈ ਦੁਨੀਆ ਭਰ ‘ਚ ਮਸ਼ਹੂਰ ਪੌਪ ਸੰਗੀਤ ਦੀ ਮੱਲਿਕਾ ਲੇਡੀ ਗਾਗਾ ਨੇ ਚਰਚਿਤ ਅਮਰੀਕੀ ਟੈਲੀਵਿਜ਼ਨ ਸ਼ੋਅ ਪੇਸ਼ਕਾਰ ਓਪੇਰਾ ਵਿਨਫਰੇ ਨੂੰ ਪਛਾੜਦੇ ਹੋਏ ਮਨੋਰੰਜਨ ਦੀ ਦੁਨੀਆ ਦੀਆਂ 100 ਮੁੱਖ ਹਸਤੀਆਂ ਦੀ ਸਾਲਾਨਾ ਸੂਚੀ ‘ਚ ਪਹਿਲਾ ਸਥਾਨ ਹਾਸਿਲ ਕੀਤਾ ਹੈ। ਵੱਕਾਰੀ ਮਨੋਰੰਜਨ ਜਗਤ ਦੀਆਂ 100 ਮੁੱਖ ਹਸਤੀਆਂ ਦੀ ਸਾਲਾਨਾ ਸੂਚੀ ‘ਚ ਟੀ. ਵੀ. ਜਗਤ ਦੀਆਂ ਹਸਤੀਆਂ, ਮਾਡਲ, ਐਥਲੀਟ, ਲੇਖਕ ਅਤੇ ਸੰਗੀਤਕਾਰ ਸ਼ਾਮਿਲ ਹਨ। ਫੋਬਰਸ ਨੇ ਗਾਗਾ ਬਾਰੇ ਲਿਖਿਆ, ”ਲੇਡੀ ਗਾਗਾ ਨੇ ਓਪੇਰਾ ਵਿਨਫਰੇ ਨੂੰ ਇਸ ਸਾਲ ਸੂਚੀ ‘ਚ ਪਿੱਛੇ ਛੱਡਦੇ ਹੋਏ ਚੋਟੀ ਦੇ ਸਥਾਨ ‘ਤੇ ਕਬਜ਼ਾ ਕਰ ਲਿਆ ਹੈ। ਪਿਛਲੇ 7 ਸਾਲਾਂ ‘ਚ ਤੀਜੀ ਵਾਰ ਅਜਿਹਾ ਹੋਇਆ ਹੈ, ਜਦੋਂ ਓਪੇਰਾ ਵਿਨਫਰੇ ਨੂੰ ਚੋਟੀ ਦਾ ਸਥਾਨ ਗਵਾਉਣਾ ਪਿਆ ਹੈ।” ਉਸਨੇ ਕਿਹਾ, ”ਗਾਗਾ ਨੇ ਇਹ ਸਥਾਨ ਆਪਣੇ ਸੰਗੀਤ ਪ੍ਰੋਗਰਾਮਾਂ ਤੋਂ 9 ਕਰੋੜ ਡਾਲਰ ਕਮਾ ਕੇ ਹੀ ਹਾਸਿਲ ਨਹੀਂ ਕੀਤਾ, ਸਗੋਂ ਇਸ ‘ਚ ਉਸਦੇ ਤਿੰਨ ਕਰੋੜ 20 ਲੱਖ ਫੇਸਬੁਕ ਪ੍ਰਸ਼ੰਸਕ ਅਤੇ ਟਵਿਟਰ ‘ਤੇ 1 ਕਰੋੜ ਚਾਹੁਣ ਵਾਲਿਆਂ ਦਾ ਵੀ ਯੋਗਦਾਨ ਹੈ।” ਹਾਲਾਂਕਿ ਇਸ ਸਾਲ ਪੈਸੇ ਕਮਾਉਣ ਦੇ ਮਾਮਲੇ ‘ਚ ਗਾਗਾ 8ਵੇਂ ਨੰਬਰ ‘ਤੇ ਹੈ। ਇਸ ਸੂਚੀ ‘ਚ ਓਪੇਰਾ ਵੀ ਬਹੁਤ ਪਿੱਛੇ ਨਹੀਂ ਹੈ। ਪਿਛਲੇ ਸਾਲ 29 ਕਰੋੜ ਡਾਲਰ ਦੀ ਕਮਾਈ ਕਰਨ ਵਾਲੀ ਓਪੇਰਾ ਨੂੰ ਇਸ ਸੂਚੀ ‘ਚ ਦੂਜਾ ਸਥਾਨ ਮਿਲਿਆ ਹੈ ਪਰ ਧਨ ਜੁਟਾਉਣ ਦੇ ਮਾਮਲੇ ‘ਚ ਉਹ ਅਜੇ ਵੀ ਪਹਿਲੇ ਨੰਬਰ ‘ਤੇ ਬਣੀ ਹੋਈ ਹੈ। ਮਨੋਰੰਜਨ ਦੀ ਦੁਨੀਆ ਦੀਆਂ 100 ਮੁੱਖ ਹਸਤੀਆਂ ਦੀ ਸੂਚੀ ‘ਚ ਤੀਜਾ ਸਥਾਨ ਸੰਗੀਤ ਦੀ ਦੁਨੀਆ ਦੇ ਨਵੇਂ ਸਿਤਾਰੇ ਜਸਟਿਨ ਬੀਬਰ ਨੇ ਹਾਸਿਲ ਕੀਤਾ ਹੈ। ਫੋਬਰਸ ਨੇ ਲਿਖਿਆ, ”ਸਿਰਫ਼ 17 ਸਾਲ ਦੇ ਬੀਬਰ ਨੇ ਪਿਛਲੇ 12 ਮਹੀਨੇ ‘ਚ ਆਪਣੇ ਵੱਖ-ਵੱਖ ਪ੍ਰੋਗਰਾਮਾਂ ‘ਚ 5 ਕਰੋੜ 30 ਲੱਖ ਡਾਲਰ ਕਮਾਏ। ਇਸ ਸੂਚੀ ‘ਚ ਚੌਥੇ ਸਥਾਨ ‘ਤੇ ਦੁਨੀਆ ਭਰ ‘ਚ ਬੇਹੱਦ ਲੋਕਪ੍ਰਿਯ ਯੂ-2 ਬੈਂਡ ਹੈ, ਹਾਲਾਂਕਿ ਯੂ-2 ਕਮਾਈ ਦੇ ਮਾਮਲੇ ‘ਚ ਦੂਜੇ ਸਥਾਨ ‘ਤੇ ਹੈ। ਐਲਟਨ ਜਾਨ ਨੂੰ ਪੰਜਵਾਂ ਸਥਾਨ ਮਿਲਿਆ ਹੈ।