ਖਾਧ ਮੁਦਰਾਸਫੀਤੀ ਹੇਠਾਂ ਪਰ ਮਹਿੰਗਾਈ ਉੱਪਰ

Date: May 20, 2011

ਨਵੀਂ ਦਿੱਲੀ, 19 ਮਈ (ਯੂ. ਐੱਨ. ਆਈ.)-

ਫਲ, ਸਬਜ਼ੀਆਂ, ਦਾਲਾਂ ਅਤੇ ਮੱਛੀਆਂ ਦੀ ਕੀਮਤ ਵਿਚ ਤੇਜ਼ੀ ਬਣੀ ਰਹਿਣ ਦੇ ਬਾਵਜੂਦ ਗੈਰ-ਖਾਧ ਪਦਾਰਥਾਂ ਦੀਆਂ ਕੀਮਤਾਂ ਵਿਚ ਭਾਰੀ ਗਿਰਾਵਟ ਆਉਣ ਨਾਲ ਪਿਛਲੀ 7 ਮਈ ਨੂੰ ਖਤਮ ਹਫਤੇ ਵਿਚ ਥੋਕ ਮੁੱਲ ਸੂਚਕ ਅੰਕ ‘ਤੇ ਆਧਾਰਿਤ ਖਾਧ ਮੁਦਰਾਸਫੀਤੀ ਘੱਟ ਕੇ 7.47 ਫੀਸਦੀ ‘ਤੇ ਰਹੀ, ਜਦਕਿ ਇਸ ਤੋਂ ਪਿਛਲੇ ਹਫਤੇ 7.70 ਫੀਸਦੀ ‘ਤੇ ਰਹੀ ਸੀ। ਅੱਜ ਜਾਰੀ ਸਰਕਾਰੀ ਅੰਕੜਿਆਂ ਅਨੁਸਾਰ ਸਮੀਖਿਆ ਅਧੀਨ ਸਮੇਂ ਵਿਚ ਜੌਂ ਦੀਆਂ ਕੀਮਤਾਂ ਵਿਚ ਚਾਰ ਫੀਸਦੀ, ਜਵਾਰ ਵਿਚ ਤਿੰਨ ਫੀਸਦੀ, ਸਮੁੰਦਰੀ ਮੱਛਲੀ ਵਿਚ ਦੋ ਫੀਸਦੀ, ਰਾਗੀ, ਬਾਜਰਾ, ਮਸਾਲੇ, ਫਲ, ਸਬਜ਼ੀਆਂ, ਛੋਲੇ ਅਤੇ ਅਰਹਰ ਦੀਆਂ ਕੀਮਤਾਂ ਵਿਚ ਇਕ-ਇਕ ਫੀਸਦੀ ਦਾ ਵਾਧਾ ਹੋਣ ਨਾਲ ਖਾਧ ਪਦਾਰਥਾਂ ਦੇ ਗਰੁੱਪ ਦਾ ਸੂਚਕ ਅੰਕ 0.4 ਫੀਸਦੀ ਚੜ੍ਹ ਗਿਆ। ਇਸ ਸਮੇਂ ਵਿਚ ਕੱਚੇ ਕਪਾਹ ਦੀਆਂ ਕੀਮਤਾਂ ਵਿਚ 16 ਫੀਸਦੀ, ਕੱਚੇ ਰਬੜ ਵਿਚ ਚਾਰ ਫੀਸਦੀ, ਅਰੰਡੀ ਵਿਚ ਤਿੰਨ ਫੀਸਦੀ, ਸੂਰਜਮੁਖੀ ਵਿਚ 2 ਫੀਸਦੀ ਅਤੇ ਕੱਚੇ ਰੇਸ਼ਮ ਦੀਆਂ ਕੀਮਤਾਂ ਵਿਚ ਇਕ ਫੀਸਦੀ ਦੀ ਕਮੀ ਆਉਣ ਨਾਲ ਗੈਰ ਖਾਧ ਪਦਾਰਥਾਂ ਦੇ ਗਰੁੱਪ ਦਾ ਸੂਚਕ ਅੰਕ 4.2 ਫੀਸਦੀ ਹੇਠਾਂ ਆ ਗਿਆ। ਇਸ ਸਮੇਂ ਵਿਚ ਤੇਲ ਮੁੱਲ ਸੂਚਕ ਅੰਕ 12.11 ਫੀਸਦੀ ‘ਤੇ ਰਿਹਾ, ਜਦਕਿ ਇਸ ਤੋਂ ਪਿਛਲੇ ਹਫਤੇ ਵਿਚ 12.25 ਫੀਸਦੀ ‘ਤੇ ਰਿਹਾ ਸੀ। ਕੋਕ ਦੀਆਂ ਕੀਮਤਾਂ ਵਿਚ 6 ਫੀਸਦੀ ਦੀ ਕਮੀ ਆਉਣ ਨਾਲ ਤੇਲ ਅਤੇ ਪਾਵਰ ਗਰੁੱਪ ਦਾ ਸੂਚਕ ਅੰਕ ਹੇਠਾਂ ਰਿਹਾ। ਹਾਲਾਂਕਿ ਇਸ ਗਰੁੱਪ ਵਿਚ ਸ਼ਾਮਲ ਲਾਈਟ ਡੀਜ਼ਲ ਦੀਆਂ ਕੀਮਤਾਂ ਵਿਚ ਚਾਰ ਫੀਸਦੀ, ਜਹਾਜ਼ ਤੇਲ ਵਿਚ ਤਿੰਨ ਫੀਸਦੀ, ਲਿਗਨਾਈਟ ਅਤੇ ਤਾਰਕੋਲ ਦੀਆਂ ਕੀਮਤਾਂ ਵਿਚ 2-2 ਫੀਸਦੀ ਅਤੇ ਫਰਨੇਚ ਆਇਲ ਦੀਆਂ ਕੀਮਤਾਂ 1-1 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ।