ਚੀਨ ਨੇ ਦਿੱਤਾ ਭਾਰਤੀਆਂ ਨੂੰ ਸਾਈਕਲ ਉਦਯੋਗ ਲਗਾਉਣ ਦਾ ਸੱਦਾ

Date: May 20, 2011

ਲੁਧਿਆਣਾ, 19 ਮਈ (ਪ,ਪ)-

ਚੀਨ ਹੁਣ ਸਾਈਕਲ ਉਦਯੋਗ ਦੀ ਤਕਨੀਕ ਦਾ ਲੈਣ-ਦੇਣ ਕਰਨ ਲਈ ਤਿਆਰ ਹੋ ਗਿਆ ਹੈ। ਇਸ ਲਈ ਉਥੋਂ ਦੀ ਸਰਕਾਰ ਨੇ ਸੰਯੁਕਤ ਉਦਯੋਗ ਦੇ ਤਹਿਤ ਉਦਯੋਗ ਸਥਾਪਿਤ ਕਰਨ ਦਾ ਸੱਦਾ ਦਿੱਤਾ ਹੈ। ਚੀਨੀ ਵਪਾਰੀ ਮੰਨਣ ਲੱਗੇ ਹਨ ਕਿ ਜੇ ਲੰਬੇ ਸਮੇਂ ਤਕ ਵਿਸ਼ਵ ਬਾਜ਼ਾਰ ਵਿਚ ਆਪਣੀ ਪਕੜ ਬਣਾਏ ਰੱਖਣੀ ਹੈ ਤਾਂ ਭਾਰਤੀ ਸਾਈਕਲ ਉਦਯੋਗ ਨੂੰ ਨਾਲ ਲੈ ਕੇ ਚੱਲਣਾ ਪਵੇਗਾ। ਇਸ ਲਈ ਹਾਲ ਵਿਚ ਸ਼ੰਘਾਈ ਵਿਚ ਹੋਈ ਸਾਈਕਲ ਪ੍ਰਦਰਸ਼ਨੀ ਵਿਚ ਉਥੋਂ ਦੀ ਸਰਕਾਰ ਨੇ ਭਾਰਤੀ ਵਪਾਰੀਆਂ ਨਾਲ ਚੀਨ ਐਂਡ ਇੰਡੀਆ ਬਾਈਸਾਈਕਲ ਟ੍ਰੇਡ ਮੀਟਿੰਗ ਦਾ ਆਯੋਜਨ ਕੀਤਾ। ਬੈਠਕ ਵਿਚ ਚੀਨ ਸਰਕਾਰ ਵਲੋਂ ਦਿ ਪੀਪਲ ਗਵਰਨਮੈਂਟ ਆਫ ਗਿਊਨਜੌਂਗ ਕੰਟਰੀ ਹੀ ਬਈ ਦੇ ਚੇਅਰਮੈਨ ਲੀ ਕਿਊਨਸੋ ਮੁੱਖ ਸਨ। ਉਨ੍ਹਾਂ ਭਾਰਤੀ ਉਦਯੋਗਪਤੀ ਵਿਸ਼ਵਕਰਮਾ ਨੂੰ ਕਿਹਾ ਕਿ ਚੀਨ ਸਰਕਾਰ ਭਾਰਤੀ ਸਾਈਕਲ ਉਦਯੋਗ ਨਾਲ ਫਿਫਟੀ-ਫਿਫਟੀ ਦੇ ਪਾਰਟਨਰਸ਼ਿਪ ‘ਤੇ ਉਦਯੋਗ ਲਗਾਉਣ ਨੂੰ ਤਿਆਰ ਹੈ। ਜੇ ਇੰਡਸਟਰੀ ਚੀਨ ਵਿਚ ਯੂਨਿਟ ਸਥਾਪਿਤ ਕਰਨਾ ਚਾਹੁੰਦੀ ਹੈ ਤਾਂ ਉਥੋਂ ਦੀ ਸਰਕਾਰ ਭਾਰਤੀ ਸਾਈਕਲ ਇੰਡਸਟਰੀ ਨੂੰ ਲੀਜ਼ ‘ਤੇ ਜਗ੍ਹਾ ਦੇ ਸਕਦੀ ਹੈ। ਇਸ ਤੋਂ ਇਲਾਵਾ 10 ਫੀਸਦੀ ਸਾਲਾਨਾ ਵਿਆਜ ‘ਤੇ ਲੋਨ ਵੀ ਮੁਹੱਈਆ ਕਰਵਾਏਗੀ। ਇਸ ਤੋਂ ਇਲਾਵਾ ਉਥੇ ਸਿਰਫ 8 ਫੀਸਦੀ ਉਤਪਾਦਨ ਟੈਕਸ ਹੀ ਲੱਗਦਾ ਹੈ। ਚੀਨ ਆਪਣੀ ਪੂਰੀ ਤਕਨੀਕ ਦੇਣ ਲਈ ਤਿਆਰ ਹੈ। ਭਾਰਤ ਵਿਚ ਵੀ ਫਿਫਟੀ-ਫਿਫਟੀ ਪਾਰਟਨਰਸ਼ਿਪ ਦੇ ਤਹਿਤ ਚੀਨੀ ਕੰਪਨੀਆਂ ਯੂਨਿਟ ਲਗਾ ਸਕਦੀਆਂ ਹਨ। ਇਸ ਵਿਚ ਚੀਨ ਸਰਕਾਰ ਸਮਝੌਤੇ ‘ਤੇ ਹਸਤਾਖਰ ਕਰੇਗੀ। ਵਿਸ਼ਵਕਰਮਾ ਨੇ ਦੱਸਿਆ ਕਿ ਚੀਨ ਕੋਲ ਜਿਹੜੀ ਤਕਨੀਕ ਹੈ ਉਹ ਕਿਸੇ ਹੋਰ ਦੇਸ਼ ਕੋਲ ਨਹੀਂ ਹੈ, ਉਥੇ ਮਲਟੀ ਆਪ੍ਰੇਸ਼ਨ ਪ੍ਰੈੱਸ ਚੱਲਦੀ ਹੈ, ਜਿਸ ਨਾਲ ਤਿੰਨ ਆਦਮੀਆਂ ਦਾ ਕੰਮ ਇਕ ਆਦਮੀ ਨਾਲ ਚੱਲਦਾ ਹੈ। ਪੇਂਟ ਪਲਾਂਟ ਵੀ ਅਜਿਹੇ ਹਨ ਜੋ ਰੰਗਾਂ ਨੂੰ ਕੰਪਿਊਟਰ ਰਾਹੀਂ ਸਾਈਕਲ ਦੀ ਬਨਾਵਟ ਦੇ ਅਨੁਸਾਰ ਬਣਾ ਦਿੰਦੇ ਹਨ। ਇਹ ਤਕਨੀਕ ਅਜੇ ਭਾਰਤ ਕੋਲ ਨਹੀਂ ਹੈ। ਉਦਯੋਗਪਤੀਆਂ ਦੇ ਪ੍ਰਤੀਨਿਧੀ ਮੰਡਲ ਨੇ ਚੀਨ ਦੀ ਸਾਈਕਲ ਫੈਕਟਰੀਆਂ ਦਾ ਵੀ ਦੌਰਾ ਕੀਤਾ। ਚੀਨ ਤੋਂ ਪਰਤਣ ਤੋਂ ਬਾਅਦ ਉਨ੍ਹਾਂ ਕਿਹਾ ਕਿ ਜੇ ਚੀਨ ਨਾਲ ਤਕਨੀਕ ਦਾ ਲੈਣ¸ਦੇਣ ਹੋ ਜਾਵੇ ਤਾਂ ਘਰੇਲੂ ਸਾਈਕਲ ਇੰਡਸਟਰੀ ‘ਚ ਨਵੀਂ ਜਾਨ ਪੈ ਸਕਦੀ ਹੈ। ਚੀਨ ਵਿਚ ਬਣੀਆਂ ਸਾਈਕਲਾਂ ਅਤੇ ਪੁਰਜ਼ਿਆਂ ਨੂੰ ਉਨ੍ਹਾਂ ਨੇ ਆਪਣੇ ਕੈਮਰਿਆਂ ਵਿਚ ਵੀ ਕੈਦ ਕੀਤਾ ਹੈ। ਇਸ ਨੂੰ ਵਪਾਰੀਆਂ ਨੂੰ ਦਿਖਾਉਣਗੇ ਤੇ ਦੱਸਣਗੇ ਕਿ ਚੀਨ ਕਿਸ ਤਰ੍ਹਾਂ ਕਾਰੋਬਾਰ ਕਰਦਾ ਹੈ।